Ջո Բայդենի վարչակազմը կուլիսներում ջանասիրաբար աշխատում է, որպեսզի պահպանի եվրոպական դաշնակիցների միասնականությունը Ռուսաստանի դեմ՝ ռուսական գազի մատակարարումների կրճատումների ֆոնին, որոնք խուճապ են առաջացրել Ատլանտյան օվկիանոսի երկու կողմերում՝ կապված ձմռանը գազի հնարավոր լուրջ պակասի հետ: Այս մասին հայտնում է CNN-ը՝ հղում անելով ԱՄՆ պաշտոնյաներին։
Ավելի վաղ «Գազպրոմը» հայտարարել էր «Հյուսիսային հոսք 1» գազատարով դեպի Գերմանիա գազի հոսքերի կրճատման մասին՝ մինչեւ իր թողունակության 20 տոկոսը՝ տուրբիններից մեկի վերանորոգման անհրաժեշտության պատճառով։ ԱՄՆ պաշտոնական ներկայացուցիչն ասել է, որ այդ քայլը պատասխանն է արեւմտյան պատժամիջոցներին, եւ Արեւմուտքին տարել է «չբացահայտված տարածք»՝ կբավարարի՞ արդյոք Եվրոպային գազը ձմռանը դիմանալու համար:
Ի պատասխան խուճապի, Սպիտակ տունը Եվրոպա է ուղարկել նախագահի գլոբալ էներգետիկայի հարցերի համակարգող Ամոս Հոխշտեյնին, ասել են պաշտոնյաները: Նա կմեկնի Փարիզ եւ Բրյուսել, որպեսզի արտակարգ իրավիճակների պլանները քննարկի էներգետիկ հարցերով ԱՄՆ-ԵՄ աշխատանքային խմբի հետ, որը ստեղծվել է մարտին՝ պատերազմի սկզբից մեկ ամիս անց:
ԱՄՆ-ը եւ Բրյուսելը խնդրում են ԵՄ անդամներին խնայել գազը, որպեսզի ձմռան համար պահեստավորեն, եւ երեքշաբթի ԵՄ էներգետիկայի նախարարները սկզբունքորեն համաձայնել են օգոստոսից մարտ ընկած ժամանակահատվածում գազի սպառումը 15 տոկոսով կրճատել:
Առաջիկա օրերին նաեւ քննարկումներ կլինեն եվրոպական միջուկային արդյունահանման ծավալների ավելացման ուղղությամբ՝ գազի պակասը փոխհատուցելու համար, ասել են պաշտոնյաները: Գերմանիան պլանավորում էր ամբողջությամբ դադարեցնել միջուկային էներգիան մինչեւ 2022 թվականի վերջը, սակայն ԱՄՆ պաշտոնյաները հույս ունեն համոզել Բեռլինին երկարացնել մնացած երեք ատոմակայանների կյանքը էներգետիկ ճգնաժամի պայմաններում, ասել է պաշտոնյան։
ԱՄՆ պաշտոնյաները, որոնք սերտ կապի մեջ են եղել այդ հարցով իրենց գերմանացի եւ ֆրանսիացի գործընկերների հետ, չափազանց անհանգստացած են, որ ձմռանն ընդառաջ Եվրոպան կարող է բախվել գազի լուրջ պակասի: Դա պայմանավորված է նրանով, որ ԵՄ երկրները կպայքարեն իրենց պաշարները համալրելու համար առաջիկա մի քանի ամիսների ընթացքում, քանի որ «Հյուսիսային հոսք 1»-ն ապահովում է իր հզորության միայն մի մասը:
Գերմանիան հրաժարվել է Ռուսաստան-Եվրոպա մեկ այլ գազատարի՝ «Հյուսիսային հոսք 2»-ի կառուցման ծրագրերից, ԱՄՆ-ը դեմ էր այդ գազամուղին՝ զգուշացնելով, որ դա միայն կմեծացնի Եվրոպայի կախվածությունը ռուսական գազից: Սակայն Գերմանիան պնդում էր, որ գազատարը զուտ կոմերցիոն նախագիծ է եւ կարող է որպես էներգետիկ կամուրջ ծառայել, քանի որ երկիրը աստիճանաբար հրաժարվում է միջուկային էներգիայից եւ ածխից: